DIT loke formasaun iha Distritu Baucau

Atu joventude no Membru Falintil-Forsa Defesa Timor Leste iha Distritu bele asesu ba iha formasaun hasa’e liu tan sira nia kapasidade, Dili Instituto of Tecnologi (DIT) loke tan sira nia cabang iha Distritu Baucau iha tinan ne’e.

“Ami la luga fatin ida ne’e, maibe fatin ida ne’e husi governo liu husi Ministerio Educasaun mai koalia ho Administrador Baucau, mak entrega fatin ne’e ba ami atu hodi fo formasaun ba joventude sira no mos ba membru F-FDTL sira,” hateten Koordenador DIT Cabang Baucau, Oscar Belo iha Campus DIT Baucau, foin lalais (03/04).

Tuir Koordenador Belo, DIT loke formasaun kona ba Siensia Komputador, Finansas no Konstrusaun Jeneralidade (kursu karpintaria ho masionaria).

Kona ba profesor ne’ebe atu hanorin, Kordenador Belo dehan profesores mesak Baucau oan hotu katak la’os husi Dili mak mai hanoriin iha Baucau.

Total partisipante ne’ebe mai tuir formasaun iha DIT ne’e kada Grupo hamutuk iha nain 15 ne’ebe durante tinan ida hamutuk ema nain 45 mais F-FDTL ne’e treino iha 2010-2011 hamutuk ema nain 135i agora simu tan ema nain 19 sira sei remata iha 21 de Maio 2012 ne’e.

Iha Parte seluk tuir Grupo husi Falintil-Forsa Defeza Timor Leste, Komandante Oscar Jacinto Correia  katak, grupo ne’ebe tuir formasaun ne’e husi komponente gas maibe husi kompania Enginaria mai tuir formasaun kursus iha Dili Instituto Of Tecnologi ne’e iha area pedreiru no karpinteiru.

“Ami sente kontente tanba formasaun ne’e hanesan buat foun ba ami ne’e mak ami sente kontente no durante formasaun nia laran ne’e mos laiha problema ida ne’ebe infrenta ba ami,” Komandante Correia dehan.

Tuir nia buat ne’ebe mak sira aprende ona liu husi formasaun ne’e fila fali ba sira nia komponente gas e komponente enginaria ne’ebe sei rona fali rezultadu husi sira nia komando atu ba fali servisu iha fatin seluk atu bele aplika fali buat sira ne’ebe mak sira aprende ona.