Simu Tiha Subsidiu; “PR Taur: Veteranus No Idozus Sai Baruk Ten”

Jornal Nacional Diario, 29 Outubru 2012 

Xefi Estadu Taur Matan Ruak hateten katak, benefisiarius hanesan veteranus no idozus (Ferik no katuas sira), depois simu tiha subsidiu husi governu, sira sai baruk ten fali, tanba la halo ona servisu. 

“Imi toba, garantida hein estadu fo imi la servisu, i hau hateten ba sira, dala ruma hau hateten fali ho governu para labele fo osan, fo osan ba imi halo imi sai baruk ten hotu,” dehan xefi Estadu Taur Matan Ruak, iha nia diskursu, wainhira partisipa iha Forum Governasaun Demokratiku ne’ebe maka realiza husi United Nations Missiona Integred Timor (UNMIT), iha Palasiu Presidensial Prezidenti Nicolau Lobatu, Aitarak-Laran, Dili, Kinta-feira, foin lalais ne’e. 

Ho ida ne’e, Taur Matan Ruak esplika, Estadu iha ona hanoin ida atu fo hatene ba governu para halakon tiha programa fo subsidiu ne’e. “Dala ruma hau koalia fali ho Governu para labele fo osan,” dehan Taur Matan Ruak. 

Taur Matan Ruak afirma katak, benefisariu sira ne’ebe hetan subsidiu husi estadu, toba tiha ona garantia subsidiu maibe lakohi ona halo to’os, lakohi ona halo natar, loron kalan maka joga hodi hein de’it estadu.

 “Hau horibainhira ba Distritu sira, i veteranus antigus kombatnete sira simu osan, katuas sira simu osan, to’os la halo, natar la halo, loron kalan joga, hau dehan ba sira ita mate hotu ona,” Taur Matan Ruak haktuir. 

Xefi Estadu ne’e esplika, “Uluk iha funu larana, buat hotu fasil ba ita atu hala’o, maibe agora buat hotu difisil ba ita, tamba uluk ita nian hotu maibe agora ita mesak nian fali, tam saida mak agora difisil liu, uluk iha funu it abele halo buat hotu i agora difisil liu, difisil liu tamba uluk ne’e ita koalia ita, agora ne’e ita koalia hau, hau nian,” hateten Taur Matan Ruak.

Ho ida ne’e, Taur Matan Ruak husu ba benefisariu sira no ema hotu-hotu tenki servisu maka’as. Xefi Estadu ne’e mos hatutan tan katak, oras ne’e dadaun xefe Suku sira mos komesa ona ejiji salariu.

 “Xefi Suku sira ne’ebe mak baruk ten, labele aumenta sira nia subsidiu,” hateten Taur. Nia hatutan, agora ba oin tempo ona atu servisu maka’as para que povu bele senti katak, liderans alokal, estadu no governu preokupa duni ba sira nia moris ne’ebe mak ohin loron sei mukit no kiak.