LANSAMENTU IMUNIZASAUN PENTAVALENT IHA TIMOR LESTE

MoH 25/10/2012. Ministeriu Saúde lansa vasina foun Pentavalent nebe sei proteje labarik tinan lima mai kraik, Marka prejensa iha serimonia ne’e mak, Ministru Saúde Dr. Sergio Lobo, Sekretariu Estadu Pekuaria, Senior country officer GAVI. Jackeline Tong, Reprejentante UNICEF iha Timor Leste Hong Wei Gao, Reprejentante WHO iha Timor Leste Dr. Mario Luna, Agensia Nasional, International, Parseirus Dezinvolvimentus staff Ministerio Saúde no sel-seluktan.

Ministru Saúde iha ninia diskursu hateten Vasinasaun foun nebe agora dadaun atu lansa ne’e importante teb-tebes atu bele proteje labarik sira husi Moras hanesan, Difteria, Pertusis, Tetanus, Hepatitis B no Haemophilus influenza B (HiB).

Iha okaziaun ne’e Lobo mos apela ba povu Timor leste tomak atu bele lori sira nia oan idade tinan ida mai kraik ba klinika Saúde, atu nune’e oan sira bele hetan imunizasaun kompletu “La iha rajaun ba inan aman dehan la iha tempu ba ida ne’e”. Labarik ida sei hetan protesaun kompletu wainhira labarik ne’e lori ba klinika dala lima ba hetan assistensia imunizasaun. Hanesan inan aman tenki iha responsabilidade masimu ba ida ne’e “Sergio hatutan”.

Iha biban ida ne’e Dr. Sergio mos hatoo ninia agradese wain ba UNICEF, WHO, no GAVI nebe tulun ona povu timor leste espesialmente labarik sira nebe tinan lima mai kraik. Fiar katak labarik sira bele hetan imunizasaun kompletu. Nune’e sira bele livre husi moras sira nebe bele fo perigu ba sira nia vida.

Iha parte seluk Reprejentante UNICEF iha Timor Leste Hong wei Gao hateten Programa ida ne’e positive teb-tebes nune’e Unicef sei pronto nafatin tulun timor leste liu-liu iha parte imunizasaun nian hodi nune’e bele fo proteje ba labarik sira nebe tinan lima mai kraik.

MInisteriu Saúde mos sei lidera habelar programa imunizasaun grupu traballu atu hadi’a imunizasaun. Membru grupu traballu mak hanesan UNICEF, WHO, World Vision, Institu Nasional Saúde no organizasaun sel-seluk. MOH