HAU MAK HUUN NO ROHAN

Hanesan udan, Ha’u namlele iha kalohan ass, Ha’u baruk halerik, Ha’u baruk hamnasa, Ha’u kbiit laek tebes hasoru sirkulu moris ida ne’e. Ha’u nia neon nakonu ho matan ween, Ha’u nia fuan taridu, Ha’u mukit tebes ba Domin furak no moris naruk ida ne’e.

Hanesan ai look tahan, Ha’u namlele iha ha’u nia tarak rasik, Hanesan aifunan roja ha’u nakbelit hela iha ha’u nia horik fatin.

Atu halo taan saida..! Ba moris naruk ida ne’e, Buat hotu ba ha’u folin laek, naroman furak ba ha’u malahok loos, Manu aman kakorek hafanu ema hotu iha dadersan malirin maibe ha’u dukur nafatin.

Ha’u hakarak halai husi moris naruk ida ne’e, Ha’u hakarak semo ba kalohan aas maski ha’u liras laek, Hamnasa furak hotu ne’ebé iha ha’u nia sorin nakfilak ba ahi adas ne’ebé nakonu ho veneno.

Ha’u nia dalan naruk no naruk teb-tebes, Buat hotu ha’u liu,

Ha’u la hatene kolen,

Ha’u la hatene sura,

Ha’u la hatene siik mehi nia magarti,

Ha’u la hatene hananu knananuk furak,

Ha’u ibun ibun tutun meik,

Ha’u nanal badak atu hawelok.

Ha’u kbiit laek tebes,

Ha’u nia ain fatin nakonu ho aitarak, Ema hotu-hotu hamnasa ba ha’u nia moris hanesan ai tahan ne’ebé namlele, Hanesan ai abut ne’ebé kbiit laek hasoru ondas tasi mane ne’ebé sempre lori biban trite no sofrimentu rohan laek.

Ohin ha’u la presija buat hotu, Ha’u hakarak tebes atu moris tuir laloran moris ne’ebé iha nanis tiha ona, Ha’u atu fila ba kotuk, La iha taan dalan ba ha’u, Ha’u hakarak subar la iha ai mahon ne’ebé bele ha’u helik ba. Ha’u so fiar deit ba ha’u nia mehi ne’ebé mout ho ha’u nia toba kalan.

HAU LA PRESIJA HATENE

Wainhira mak loro kraik, Wainhira mak fulan hader iha ha’u nia fuan, wainhira mak moris foun ne’ebé ha’u hein mosu mai.

Se moris nee nakonu ho aisasiik hau hakarak o hateten

“Ha’u mak huun no ha’u mak rohan ba moris ida ne’e, Ha’u too iha huun no ha’u too iha rohan ona”.

Ba ema ida

Carinton kadalak Matebian